(( طلبتك {يمه} هاتي لي عروسة مالها رجلين ))

السلام عليكم ورحمة الله وبركاته
قصيده قريتها باحد المنتديات واعجبتني وحبيت انقلها لكم
ابي رايكم فيها ان شاء الله يعجبكم ذوقي

يجي الفرج بكرا.. يا بنيتي بس لا تبكين
أنا ما أستحمل دموعك .. وهمساتك تبكيني

نشف دمعي على خدي يا بنتي من ثلاث سنين
وصارت كل آلامي تعيش وتلتحم فيني

يا بنتي أحبسي دمعك دخيلك اكتميه الحين
حرام الدمعة في عينك تعانق ماضي سنيني

تعالي و أحضني فرحي .. وقولي للفرح آهلين
وخلي حزنك بقلبي .. دخيلك يا بعـد عيني

أشوف الدنيا بعيونك .. وأشوف الفرحة بك يا زين
وأنا مالي سواك أنت .. و أنت شمعة تضوين

علام الهم في قلبك .. يا بنتي ليه ما تحكين
أبيك تكسري همك وأنا أمك قولي حاكيني

يا يمـه حالتي صعبة أنا... والفقر صرنا أخوين
أعيش بظلمة همومي وألاقي الهم يكويني

معاقة يمه من صغري .. معاقة تشتكي حق مين
مدام إن البشر تنظر لحالي بعطف يعميني

أناظر ها البشر وأسأل ...أنا وش موقعي الحيــن؟؟
وش اللي يميز الأعمى عن اللي شوفهم زيني

فقيرة حظ يا يمـه وحالتي تعمي العينين
من اللي يعشق ويهوى معاقة حظها شيني

سألتني وش أتمنى يا يمه منيتي شيئين
يكون الفرح أولهم بعدها تعيش رجليني

أنا ودي ومنا عيني يكون لجسمي بس رجلين
تساعدني على برك ... وبرك غايتي وديني

يا ليت الناس ترحمني وترحم حالة المسكين
ولا تجلس تناظر لي بنظره تجرح سنيني

تلاقين الفرح مظلم ونور الحزن وسط العين
وألاقي الهم والحسرة وسم ها الوقت بجبيني

معاقة يمه قولي لي علامك ساكتة تبكين
كلامي أزعجك أدري ... وأدري الدمع يشاكيني

دخيلك يمـه لي رجوه مدام قادرة تكفين
أبي لي لعبة يا يمه تكون الصادقة بعيني !!

طلبتك {يمه} هاتي لي عروسة مالها رجلين
وأبيها تكون في كرسي .. ( معاقة ) مثلي ترثيني؟؟